Ente la celebración de los actos institucionales del “Principado” pal Día d’Asturies en Ribeseya, les persones y coleutivos que roblamos embaxo manifestamos que:
1.Les actividaes y programación dispuesta pol gobiernu del PSOE-IU, d’un marcáu calter antiasturianu, respuenden a la conceición fonderamente provinciana y sucursulista d’estos políticos pa con Asturies, siendo incapaces d’atalantar la riqueza cultural d’esti país y la bayura y calidá de músicos y artistes de tolos estilos que pueblen el mesmu.
2.El fechu en si de l’apueste por un productor como Jose Luis Moreno, que ta involucráu en casos de corrupción n’alxudicación de gales televisives n’otres partes del estáu, con un procesu xudicial abiertu, paeznos que ye motivu suficiente como pa refugar a esti personaxe y la so ufierta aculturadora, más si vemos que la so apueste estrella ye la casposa tonadillera y tamién procesada por corrupción, Isabel Pantoja.
3.A pesar del xiru dau polos organizadores del eventu, entendemos que nun ye por propia voluntá, sinón pola presión esterior recibía dende tolos seutores de la sociedá y tol revuelu mediáticu que siguió a l’anunciu de la programación, onde nun s’atopaba dengún artísta d’Asturies, nin rellacionáu cola cultura asturiana.
4.Poro, les persones qu’ellaboramos esti manifiestu, entamaos tamién la xera pa celebrar un festival alternativu que dende l’autoxestión pretende dar una llección a los nuesos politiquinos, demostrando-yos que la dignidá nun entiende de dineru y que pese al so despreciu pola nuesa cultura y poles persones que la caltienen viva, nun van ser quien a callanos nin tampocu domanos.
5.Asoleyamos el nuesu sofitu a la programación alternativa qu’ente toos y toes tamos ellaborando pa los díes 10 y 11 de Setiembre en Ribeseya y que cuntará con una programación los más variada posible, gracies al sofitu desinteresáu de grupos de musica, deportivos, persones y coleutivos de toa triba.
No hay comentarios:
Publicar un comentario